Presidenti rus Vladimir Putin ka shprehur qartë kërkesat e tij për një marrëveshje të mundshme me Ukrainën gjatë një samiti treorësh me Presidentin amerikan Donald Trump, zhvilluar dje.

Sipas zyrtarëve evropianë të njohur me përmbajtjen e bisedimeve, të cilat u transmetuan nga Trump sapo u kthye në Uashington, Putin ka kërkuar që Ukraina të heqë dorë nga rajoni i Donbasit në lindje të vendit, shkruan CNN, përcjell Bota sot”

Në këmbim, Putin do të ishte i gatshëm të ngrinte vijën aktuale të frontit në rajonet e tjera të pushtuara si Kherson dhe Zaporizhzhia, si dhe të jepte një premtim për të mos sulmuar më Ukrainën apo ndonjë shtet tjetër evropian.

ImageHartaFoto galeri
Megjithatë, Putin nuk hoqi dorë nga kërkesa e tij për të “eliminuar shkaqet rrënjësore” të luftës në Ukrainë – një term që për Rusinë nënkupton zvogëlimin e ushtrisë së Kievit, braktisjen e aspiratave për t’u anëtarësuar në NATO dhe shpalljen e një statusi neutral për Ukrainën.

Detajet e kërkesave të Putinit dolën në pah kur Trump informoi liderët evropianë për përmbajtjen e takimit menjëherë pas kthimit në SHBA.

Sipas burimeve diplomatike, Trump është shprehur se një marrëveshje mund të arrihet shpejt nëse kërkesat e Putinit pranohen, dhe ai ka planifikuar të diskutojë këtë çështje me Presidentin ukrainas Volodymyr Zelensky në Shtëpinë e Bardhë të hënën.

Gjithashtu, Trump ka shprehur një hapje të mundshme për të ofruar garanci sigurie për Ukrainën pas përfundimit të luftës, edhe pse ende nuk ka qartësi se çfarë formë do të marrin këto garanci.